Kulturë
Muzikë
- Si u zhdukën 43 hektar tokë – Akuzohen ish-zyrtarë për shkelje të ligjit të kadastrës në zonën Vuthaj–Guci
Ish-punonjësit e Administratës për Pasuri të Paluajtshme kanë kaluar tokë shtetërore në emër të personave fizikë, dëmi 1.300.000 euro?
Në Plav janë proceduar tre ish-zyrtarë të Administratës për Pasuri të Paluajtshme. Ata akuzohen se kanë kaluar tokë shtetërore në emër të personave fizikë dhe i kanë shkaktuar shtetit dëm prej mbi 1.300.000 euro.
Siç është bërë e ditur nga Policia, pas përfundimit të aktiviteteve policore-prokuroriale për zbulimin e veprave penale korruptive, zyrtarët e Policisë kanë paraqitur kallëzim penal në Prokurorinë Themelore kundër tre personave që, duke keqpërdorur pozitën zyrtare, i kanë shkaktuar shtetit dëm prej mbi 1.300.000 euro.
“Për shkak të dyshimit se kanë kryer veprat penale: keqpërdorim i pozitës zyrtare në mënyrë të vazhdueshme, në dëm të Malit të Zi, policia ka paraqitur kallëzim penal kundër R.Š. (36) nga Plava, ish-kryeshefe e Administratës për Pasuri të Paluajtshme në Plavë; M.H. (68), ish-kryeshef i Administratës për Pasuri të Paluajtshme në Plavë; dhe N.V. (64), punonjës i kësaj administrate”, thuhet në njoftim.
Të dyshuarit, sipas hetimeve, i kanë kryer këto aktivitete kriminale vazhdimisht nga fillimi i vitit 2018 deri në shkurt 2020, duke keqpërdorur pozitën e tyre zyrtare dhe duke vepruar në kundërshtim me ligjin, duke kaluar dhe regjistruar në mënyrë të paligjshme tokë shtetërore – më herët në pronësi të Malit të Zi – në emër të personave fizikë, në një sipërfaqe totale prej mbi 43 hektarësh. Me këtë veprim, personave të tjerë u është siguruar përfitim i kundërligjshëm pasuror, ndërsa shtetit i është shkaktuar dëm material prej më shumë se 1.300.000 euro.
“Ata dyshohen se këto vepra i kanë kryer në cilësinë e anëtarëve të Komisionit për paraqitjen publike të të dhënave në zonën kadastrale Vuthaj – Guci, duke tejkaluar autorizimet, duke mos kryer detyrat zyrtare dhe duke vepruar në kundërshtim me ligjin dhe aktet nënligjore. Në këtë mënyrë, personave fizikë u kanë mundësuar regjistrimin dhe transferimin e paligjshëm të tokës shtetërore në pronësi private, ku si bazë e fitimit të pronësisë është paraqitur padrejtësisht ‘trashëgimia’”, thuhet në njoftim.
Zyrtarët e Policisë së Malit të Zi vazhdojnë aktivitete intensive për zbulimin e veprave penale me rëndësi kombëtare, me fokus të veçantë në identifikimin dhe procedimin e veprimeve korruptive të kryera nga punonjës të institucioneve shtetërore, me të cilat, përmes keqpërdorimit të pozitës dhe autorizimeve, i shkaktohet dëm shtetit dhe qytetarëve të Malit të Zi.
